حب مصر

ميت ألف فرصه عشان أسيب مصر
ولا عمري سبتها
ولا عمري بعتها
علشان هى بلادي اللي بجد بحبها
بحبها بكدبها وصدقها
بحب فيها أصالة وندالة أهلها
بحب فيها سهرها
بحب زيفها وأصلها
بحب فيها طلعة شمسها
تنور وشها
بحب فيها قمرها
طالع يغازل حسنها
بحب المشي فيها
علي شط نيلها وبحرها
بحب فيها بناتها
راسمين ملامح شعبها
دي بنت مايصه وحاطلها
توكة في شعرها
ودي بنت جد ونازله
جري لشغلها
ياترى تلاقي فين بلد زيها
كل اللي فيها بيحبها
فيها الكنايس والجوامع
بتحضن بعضها
مسلم ... مسيحي إخوات
راضعين من طيبة صدرها
نبع الحنان ويناموا
حاضنين أرضها
هتلاقي فين بلد شكلها
كل حاجه فيها
تخليك تحبها
هتقولي ظالمه
هقولك برضه بحبها
هتقولي ضلمه
ماهو ده سواد شعرها
هتقولي زحمه
هقولك عشان بنعشق أرضها
هتقولي فيها فساد
هقولك ده من طيبة شعبها
جرب كده تسهر لوحدك في ليلها وحسنها
علي ضف نيلها وشطها
مش هتلاقي متعة قدها
جرب تشوف بنت حلوه
مع شاب واقف جنبها
بيحبها
وشايل في قلبه
هموم الدنيا كلها
وبرضه بيحبها
طب جرب كده تاكل دره وترمس
علي شطها وتحلم حلمها
وتشوف وشوش الناس
وتضحك زيها
و هاسألك عن جمالها وعشقها
فكر كده...لو ماشي لوحدك
ووقعت في مشكله
مش بتلاقي ألف واحد
جنبك بيحلها
لا تعرفهم ولا يعرفوك
بس جمعكم حبها
أهي هي دي مصر
اللي بعشق ترابها وأهلها
وبموت فيها وفي أرضها
زاحمه.. ظالمه..
فاسده.. ضلمه..مش مهم
ده كفايه خفة دمها
وهفضل لمصر أقول وأعيد
أنا أصلي عاشق أرضها
وعاشق برضه لشعبها[i][b]